Nafarroako Erdialdeko Ibilbideen Sarea izeneko ibilbideak turismo aktibo eta jasangarrirako bi espazio batzen ditu, Nafarroako Erdialdea Garatzeko Partzuergoak sortuak azken urteotan. Alde batetik, Erdi Aldea BTT Gunea dago, 2020an inauguratua; eta, bestetik, “Erdialdetik oinez” bidexken sarea, 2022an inauguratua. Erdialdeko Ibilbideen Sareak balioa ematen dio gure lurraldeko ondare natural, kultural eta historikoari, eta jarduera jasangarriak sustatzen ditu zailtasun-maila desberdinetako ibilbideen bidez, bai ibiltariendako, bai BTT zaleendako, ibilbideak beren egoera fisikora eta trebetasunera egokitu ahal izateko. Era berean, bi guneetarako kudeaketa planak honako hauen babesa du: parte hartzen duten udal-erakundeak, ostalaritza- eta turismo-establezimenduak, mendizale eta BTT zaleen elkarteak eta gure lurraldeko boluntarioak, funtsezkoak direnak gure ibilbideak behar bezala mantentzeko. Erdialdea Nafarroako Erriberaren eta Pirinioetako lehen mendilerroen arteko trantsizio-eremua da, eta bertako baldintza klimatologiko eta orografikoek gure lurraldea leku bereziki egokia bihurtzen dute ibilbide horietaz gozatzeko. Gainera, kultura-ondare zabala duten herriak bisitatzeko aukera ematen du (Erriberri, Uxue, Artaxoa, Gares), bai eta horietan gastronomiaz eta ardoez gozatzeko ere. Erdialdeko Ibilbideen Sarea sare bat da, bere izenak adierazten duen bezala, gure lurraldeko herri garrantzitsuenetako batzuk lotzen dituena.