Nafarroako Unibertsitateak eta Eslabako Udalak, Nafarroa Ezagutu Sareko bazkideak, lankidetza hitzarmen bat sinatu dute, eta, horren bidez, zentro akademikoak aholkularitza zientifikoa emanen du herri horretan dagoen Santa Crizko proiektu arkeologikoan. Akordioaren helburua aztarnategiaren azterketa, hedapena eta sustapena sendotzea eta bultzatzea da, Nafarroako Gobernuak Interes Kulturaleko Ondasuntzat jotzen baitu.
Julia Pavón Nafarroako Unibertsitateko Filosofia eta Letren Fakultateko dekanoak eta Estíbaliz Lerga Eslavako alkateak sinatu dute hitzarmena. Sinaduran izan dira, halaber, Sagrario Zabaleta, udalerriko zinegotzia; Francesca Mariani, Santa Crizko koordinatzailea udaletxean; Luka García eta María García-Barberena, aztarnategia ustiatzeko lanez arduratzen diren arkeologoak; Javier Andreu, Nafarroako Unibertsitateko Arkeologiako Diplomaren zuzendaria; eta Jesús María Ezponda, zentro akademikoko idazkari nagusia.
Akordio horren bidez, Nafarroako Unibertsitateak aholkularitza zientifikoa emanen dio Eslabako Udalari aztarnategiari lotutako jarduerak garatzeko. Aurreikusitako ekintzen artean, honako hauek sartzen dira: jarduketa-estrategiak diseinatzea, lantaldeak osatzea, memoriak eta hedapen-planak egitea, eta ikerketari eta proiektuaren sustapenari buruzko aholkularitza orokorra ematea.
Halaber, hitzarmenak aurreikusten du Nafarroako Unibertsitateko Arkeologiako Diplomako ikasleek parte hartuko dutela aztarnategiko indusketa kanpainetan, hura dinamizatzearekin lotutako jardueretan eta bisita gidatuetan, prestakuntza akademikoaren parte gisa.
Sinaduran, bi erakundeek ondare historikoaren kontserbazioarekin eta eskualdearen sustapenarekin duten konpromisoa berretsi dute, eta lankidetza horren garrantzia nabarmendu dute, aztarnategiaren azterketa zientifikoan aurrera egiteko eta haren balioa indartzeko. Gainera, akordio horrek lurraldeko ikerketa arkeologikoari ematen dion bultzada azpimarratu dute.
Nafarroako Unibertsitatearen eta Eslabako Udalaren arteko lankidetza 2017an hasi zen, erromatar hiri horren aurkikuntzaren mendeurrenaren esparruan akordio bat sinatu zenean. Ordutik, ikastetxe akademikoko 75 ikaslek lagundu dute aztarnategian egiten diren lanetan, Javier Andreu irakasleak koordinatuta, Antzinako Historiako katedraduna. Bestalde, akordio horren esparruan, 3 monografia argitaratu dira Santa Crizen material arkeologiko berezienei buruz, bai eta zenbait artikulu zientifiko ere erromatar hiriko foroari eta nekropoliari buruzko inpaktu-aldizkarietan, biak ere bisitagarriak, eta Nafarroan kontserbatutako hiri erromatarrik monumentalenari balioa ematen lagundu dute.